Өзбекстан бокс федерациясы Абылайхан Жүсіповтің жеңісін мойындамай, қарсы шықты

Eindhoven Box Cup 2025 халықаралық турниріндегі финалдық жекпе-жек – Абылайхан Жүсіпов пен Асадходжа Муйдинходжаев арасындағы айқас – жарыс қорытындысы шыққаннан кейін де қызу талқыланып жатыр. Бұл туралы Sportinside.kz хабарлайды.

Жақында Өзбекстан бокс федерациясы бұл жекпе-жекке қатысты ресми пікірін білдірді.

Өзбек тарабы не дейді?

Федерацияның ресми мәлімдемесінде:

«70 келі салмақ дәрежесіндегі финалдық жекпе-жек бірінші раундтан кейін тоқтатылды. Қазақстандық боксшы жарақат алып, кездесуді жалғастыра алмады. Тең өткен раунд төрешілердің түсініксіз шешімімен аяқталып, 2:3 есебімен жеңіс Қазақстан өкіліне берілді», – делінген.

Яғни өзбек тарабы төрешілер шешімін "түсініксіз әрі даулы" деп бағалап отыр. Олар бұл жағдайда жекпе-жек тоқтатылған соң, тең нәтижені немесе қайта жекпе-жек өткізуді әділ шешім ретінде қарастыру қажет болғанын меңзейді.

Айта кетейік, бұл турнирде Қазақстан атынан сынға түскен 10 боксшының бесеуі финалға дейін жетіп, барлығы жеңіске жетті.