Серік Сәпиевтің қызы әлемдік жарыста тарихи нәтижеге қол жеткізді

Атақты боксшы, Олимпиада чемпионы Серік Сәпиевтің қызы Аққу Сәпиева Грузияда өткен спорттық-балдық би бойынша әлем чемпионатында үздіктер қатарынан көрінді, деп хабарлайды Sportinside.kz.

13 жастағы Аққу 28 елден келген 124 қатысушының ішінде 5-орынды иеленді. Бұл туралы спорт журналисі Аян Төлеген өзінің Telegram-арнасында жазды. Оның айтуынша, Аққу төрт жасынан бастап билеп келеді және биді өзінің эмоциясы мен жан дүниесін жеткізудің басты жолы деп санайды.

Жас өнерпаз алдағы уақытта шеберлігін жетілдіріп, Қазақстан атынан ірі халықаралық додаларға қатысуды көздейді. Сонымен қатар, болашақта бапкер болып, өз тәжірибесін өзгелермен бөлісуді армандайды.

Серік Сәпиев – Қазақстан тарихындағы ең танымал әуесқой боксшылардың бірі. 2012 жылы Лондонда Олимпиада чемпионы атанып, әлемнің ең үздік боксшысына берілетін Вэл Баркер кубогын иеленген.