Әнші Серік Ибрагимов "Қайрат" клубы үшін үйін сататынын айтты

Әнші Серік Ибрагимов УЕФА Чемпиондар лигасының топтық кезеңі басталар алдында көпшілікті күлдірген ерекше хабарламасын бөлісті, деп хабарлайды Sportinside.kz. 

Өнер иесі Instagram парақшасында Алматыдағы Орталық стадионға жақын орналасқан үйін сататынын жариялады.

Ибрагимовтің айтуынша, аталған баспанадан стадионда өтетін барлық ойындарды айқын көруге болады.

"Құрметті алматылықтар! Орталық стадионның жанындағы үйімді сатамын. Біздің үйден барлық матч анық көрінеді", – деп жазды ол.

Айта кетейік, 28 тамызда Монакода Чемпиондар лигасының жеребесі өтті. Оның қорытындысы бойынша «Қайрат» топтық кезеңде Испанияның "Реал Мадрид", Бельгияның "Брюгге", Грекияның "Олимпиакос" және Кипрдің "Пафос" клубтарына қарсы ойнайды. Ал сырт алаңда қазақстандық команда Италияның "Интер", Англияның "Арсенал", Португалияның "Спортинг" және Данияның "Копенгаген" клубтарымен күш сынасады.

Матчтар 16 қыркүйектен 28 қаңтарға дейін өтеді.