"Қайрат" Чемпиондар лигасында үлкен рекорд жасап, Еуропаны таңғалдырды

Алматылық "Қайрат" футбол клубына УЕФА Чемпиондар лигасы тарихындағы ең алыс сапарға шығу бұйырып отыр, деп хабарлайды Sportinside.kz.

Бейсенбі күні өткен жеребеде алматылықтар өз қарсыластарын анықтап, төрт ойынды өз алаңында, төрт матчын сырт алаңда өткізетіні белгілі болды.

Сол сапарлардың бірі – Португалияның Лиссабон қаласында "Спортингке" қарсы өтетін кездесу. Бұл ойынға бару үшін "Қайрат" 6900 шақырымнан астам жол жүреді.

Бұған дейінгі ең ұзақ қашықтық 2015/16 маусымында тіркелген еді. Ол кезде топтық кезең аясында лиссабондық "Бенфика" мен "Астана" клубтары шамамен 6100 шақырым жолды еңсерген болатын.