"Қайрат" футбол клубы тарихи жетістігі үшін қанша табыс тапты?

Алматының "Қайрат" футбол клубы Чемпиондар лигасының топтық кезеңіне жолдама алып, қомақты табысқа қол жеткізді, деп хабарлайды Sportinside.kz.

Басылым мәліметінше, алматылықтар іріктеу кезеңінде словениялық "Олимпияны" (екі ойын қорытындысы – 3:1), финляндиялық "КуПС"-ті (3:2) және словакиялық "Слованды" (1:1, пенальтиде – 4:3) жарыстан шеттетті. Ал плей-офф сатысында шотландиялық "Селтиктен" (0:0, пенальтиде – 3:2) басым түсті.

Осы жеңістердің арқасында "Қайрат" Чемпиондар лигасының негізгі кезеңіне өтіп, 18,62 млн еуро (шамамен 11,6 млрд теңге) табысқа ие болды.

Сонымен қатар, топтық кезеңдегі әрбір жеңіс үшін клубқа – 2,1 млн еуро (1,3 млрд теңге), ал тең нәтиже үшін – 700 мың еуро (436 млн теңге) сыйақы қарастырылған.

Айта кетейік, "Қайрат" тарихи жетістікке қол жеткізіп, плей-офф раундының қарымта матчында өз алаңында "Селтикті" ұтып, топтық кезеңге жолдама алған болатын.