"16 жыл күттік": Жахан Отарғалиев қуанышты жаңалығын айтып, жылап қалды (ВИДЕО)

Белгілі актер, блогер әрі продюсер Жахан Отарғалиев достығы мен жеке арманы туралы жүрекжарды жазбасын бөлісті.

Ол Instagram парақшасында досы, блогер Елдос Кадирхановты (желіде танымал аты – Колобок) шын жүректен құттықтап, көпшілікпен өзінің де ішкі сырын бөлісті. Жаханның айтуынша, ол мен жұбайы 16 жылдан бері ата-ана болуды армандап келеді.

"Колобок үшін қатты қуаныштымын. Видеосын көріп бәріміз жыладық, бұл – ерекше сезім. Біз де үмітімізді үзбей келеміз. Алла қаласа, бізге де сәбиді нәсіп етеді. 16 жыл күттік, тағы да шыдауға дайынбыз. Досым Елдос үшін өте қуаныштымын. Бір-бірімізге үнемі қолдау көрсетіп келеміз. Алла жар болсын!", – деді Жахан.

Сондай-ақ, ол көпшіліктен өзіне жолданған қолдау хаттары мен тілектердің жүрегін елжіреткенін де атап өтті.

"Мені танымаса да дұға жасап жүрген жандар бар. Сол үшін Аллаға шүкір. Әрбір бала – Алланың сыйы. Гендер пати жасау идеясын да жазып қойдым. Қазір баласы бар адамдар шүкір етсін. Өйткені отбасыдан асқан байлық жоқ. Ақша мен дүние уақытша, ал нағыз бақ – отбасында", – деп түйіндеді ол.