"Мінсіз болды деп айта алмаймыз": Назым Қызайбайдың бапкері шәкіртінің кемшілігін айтты

Алматы әйелдер бокс құрамасының аға жаттықтырушысы Долкунжан Камеков Астанада өткен Әлем кубогының нәтижелеріне қатысты пікір білдірді, деп хабарлайды Sportinside.kz.

Оның айтуынша, турнир ұлттық құрама үшін маңызды сынақ болды.

– Өз елімізде ұйымдастырылған Әлем кубогының кезеңі біздің спортшылар мен бапкерлер үшін үлкен емтихан тәрізді өтті. Жалпы алғанда, команда өзіне жүктелген міндетті абыроймен атқарды. Дегенмен, бәрі мінсіз болды деп айта алмаймыз – жетілдіруді қажет ететін тұстар бар. Ең маңыздысы – біз әр спортшының мүмкіндігін бағалап, болашақта қандай бағытқа назар аудару керектігін түсіндік, – деді Камеков.

Жаттықтырушы Назым Қызайбайдың өнеріне жеке тоқталды. Оның сөзінше, Назым жеңіл жарақатына қарамастан финалға дейін жетіп, жоғары деңгейдегі техникалық және тактикалық дайындық көрсеткен.

– Ол тамаша жекпе-жектер өткізді, нағыз спортшыға тән мінез көрсетті және өз салмағында үздік екенін тағы бір мәрте дәлелдеді, – деді бапкер.

Еске сала кетейік, Астанада өткен Әлем кубогында 48 келіге дейінгі салмақ дәрежесінде өнер көрсеткен Назым Қызайбай алтын медаль жеңіп алды.