«Менің үйімде бір апта тұрып көр»: танымал боксшы АҚШ президенті Трампты Украинаға шақырды

Әлемге әйгілі украиналық боксшы Александр Усик АҚШ-тың бұрынғы президенті Дональд Трампқа күтпеген ұсыныс жасады. Бұл туралы Sportinside.kz хабарлайды.

BBC мәліметінше, Усик Трампты Украинаға келіп, оның үйінде бір апта өмір сүріп көруге шақырды. Бұл мәлімдеме қазіргі Украинадағы жағдайға қатысты АҚШ саясаткерлерінің пікірлеріне жауап ретінде айтылған.

«Мен Дональд Трампқа Украинаға келіп, менің үйімде бір апта өмір сүруді ұсынамын. Бар болғаны бір апта. Үйімді беремін. Осында өмір сүріп, нақты не болып жатқанын өз көзімен көрсін», – деді Александр Усик.

Бұл ұсыныс Трамптың бұған дейін соғысқа қатысты айтқан екіұшты пікірлерінен кейін жария етілді. Украинада соғыс жүріп жатқанына бірнеше жыл болса да, кейбір әлемдік саясаткерлер оның ауқымы мен салдарын толық түсінбегендей күйде қалуда. Усиктің үндеуі дәл осы түсініспеушілікті жоюға бағытталған.

Александр Усик тек рингте ғана емес, ел ішіндегі және халықаралық деңгейдегі ақпараттық майданда да белсенді. Ол Украинаның патриот азаматы ретінде өз позициясын ашық айтып келеді. Усик – бірінші ауыр салмақта бұрынғы абсолютті әлем чемпионы, ал қазіргі уақытта супертяж салмақта жеңіліс көрмеген чемпион. Оның кәсіби рекорды – 23 жеңіс, 14 нокаутпен аяқталған.