39 жылдан кейін ақталды: Ақтөбелік азамат Желтоқсан оқиғасына байланысты енді толық ақталды

Желтоқсан көтерілісіне қатысып, сол үшін қуғын-сүргінге ұшыраған ақтөбелік азамат 39 жылдан кейін толық ақталып шықты. 

Ақтөбе қаласының тұрғыны 1984 жылы Гурьев облыстық партия комитеті мен Мақат локомотив депосы кәсіподағының жолдамасымен Қазақ мемлекеттік университетінің дайындық курсына қабылданған. Келесі жылы философия және экономика факультетінің студенті атанса да, 1986 жылы университеттің екінші курсынан шығарылған. Себеп – Желтоқсан оқиғасына қатысты деген күдікпен еш айып тағылмастан құқық қорғау органдары тарапынан ұсталып, кейін босатылуы.

Бұл оқиғадан кейін азамат КОКП қатарынан да шығарылып, жұмыс табу мүмкіндігінен айырылып, отбасымен бірге әлеуметтік қиындықтарды бастан өткерген. Жұбайы да философия факультетін тәмамдағанымен, жұмысқа орналасуда түрлі тосқауылдарға тап болған. 1990–1993 жылдары үш баласы бар жас отбасы баспананы жалдап тұруға мәжбүр болған.

Сотқа жүгінуі және шешім

2025 жылы 64 жастағы ақтөбелік азамат Алматыдағы 1986 жылғы Желтоқсан көтерілісіне қатысқаны үшін көрген қысымдарын заң жүзінде мойындату мақсатында сотқа талап арыз түсірді. Ақтөбе қаласының №3 соты іс материалдарын зерттей келе, оның шын мәнінде саяси қуғын-сүргінге ұшырағанын анықтады. Университет пен прокуратурадан алынған архивтік құжаттар, сондай-ақ куәлердің айғақтары бұл деректерді дәлелдеді.

Сот ҚР Азаматтық процестік кодексінің 306-бабына және «Жаппай саяси қуғын-сүргін құрбандарын ақтау туралы» Заңның 2-бабына сүйене отырып, азаматты саяси қуғын-сүргін құрбаны деп ресми түрде таныды.

Сот шешімі заңды күшіне енді.