«Сен тағы бір отбасын жезөкше үшін құрдымға жібердің»: опасыз махаббат хикаясы

Парижде аргентиналық мелодрама өрбіп жатыр. ПСЖ шабуылшысы Мауро Икарди мен оның әйелі әрі агенті Ванда Нараның отбасылық дауы – көпшіліктің назарында. Бастапқыда махаббат пен сенімге құрылған қатынас, қазір сатқындық пен күмәнмен жалғасуда.

«Сен тағы бір отбасын ойрандадың»

2021 жылдың 17 қазанында Ванда Нара әлеуметтік желіге әсерлі жазба қалдырды:

«Сен тағы бір отбасын жезөкше үшін құрдымға жібердің», – деп күйеуін тікелей айыптады. Сол күні-ақ ол өзінің парақшасынан Икарди екеуінің барлық фотосуреттерін өшіріп тастады.

Кейін Ванда жеке детектив жалдап, Икарди телефонындағы хат-хабарларын оқып шыққан. Сол кезде футболшының 29 жастағы аргентиналық актриса, модель әрі әнші Чина Суареспен жасырын сөйлесіп жүргені әшкере болған. БАҚ-тың жазуынша, Суарес Икардиге ел танымайтын жерде кездесуді ұсынған.

«Саусағымда енді неке жүзігі жоқ»

Скандалдан кейін Икарди Вандамен бірге түскен фотоларын қайта жариялады. Бірақ Нара бұған мүлде басқаша жауап берді:

«Маған қолымда неке жүзігі болмағаны ұнайды», – деп сториске жүзіксіз қолының суретін қойды.

Қазір жұптың арасында қарым-қатынастың суып кеткені айқын байқалады. Ванда балаларын алып, Парижден кетіп қалған. Икарди болса, жаттығуға бармай, тіпті Чемпиондар лигасының маңызды ойынына да қатыспаған.

«Жақындарыңа ауыртпалық сыйлау – бұл ауыр»

Бірақ Икарди үмітін үзбей, Instagram парақшасында жұбайына арналған жазба жариялады:

«Сенің бұл отбасына сенуді жалғастырып жатқаның үшін рахмет. Сен – біздің өміріміздің тірегі. Саған деген махаббатым шексіз. Жақындарыңа ауыртпалық сыйлау – бұл ауыр. Адам кешірім сұрағанда ғана жазылады», – деді футболшы.

Күрделі өткен шақ және жаңа бастамалар

Мауро мен Ванда 2014 жылы үйленген. Бұған дейін Ванда аргентиналық футболшы Макси Лопестің әйелі болған. Бірақ ол күйеуінен кетіп, досы Икардиге тұрмысқа шыққан. Бұл әрекеті көпшіліктің сынына ұшырап, тіпті Лионель Месси де Лопеске қолдау білдіріп, Икардиге теріс қараған.

Икарди мен Ванданың екі қызы бар. Жұбайы оған тек сүйікті жары ғана емес, агенті ретінде де көмек көрсетіп келді. «Интермен» келіссөздерден бастап, ПСЖ-ға ауысуына дейінгі барлық процестерге Ванда тікелей қатысқан.

Ал Ванданың бұрынғы күйеуі Лопес – үш ұлдың әкесі. Ол балаларын көруге мүмкіндік жоқ екенін бірнеше рет айтып, эмоцияға ерік берген. Кейін Лопес жаңа өмір бастап, швед моделі Даниэлла Кристианссенмен жұп құрған.

Су бетіне шыққан атышулы үшінші тарап – Чина Суарестің де өмірі тыныш емес. Ол да үш баланың анасы, актер Николас Кабре мен Бенхамин Викуньямен болған қарым-қатынасынан балалар дүниеге келген.