Ресейдегі ұлты қазақ, руы қыпшақ боксшы қызы ел күтпеген хабарды айтты

Ресейдің әйелдер құрамасында өнер көрсететін этникалық қазақ қызы Салтанат Меденова IBA ұйымдастырған әлем чемпионатының (Дубай, БАӘ) финалында болған даулы жекпе-жекке қатысты пікір білдірді, деп хабарлайды Sportinside.kz.

Финалда ресейлік Всеволод Шумков пен өзбекстандық Абдумалик Халоков кездескен болатын. Меденова IBA президенті Умар Кремлевтің Instagram парақшасындағы жазбасына пікір қалдырып, жекпе-жек нәтижесінің заңды екенін атап өтті.

"Бұл жекпе-жекте жеңіске Шумков жетті. Қарсы тарап та, Өзбекстан құрамасы да ешқандай наразылық білдірмеді. Демек, олар нәтиженің әділ екенін мойындады", – деп жазды Салтанат Меденова.

Еске сала кетейік, финалдық айқаста Шумков төрешілердің шешімімен жеңіске жетіп, 60 келіге дейінгі салмақта әлем чемпионы атанды. Алайда жекпе-жектен кейін оның қарсыласы Халоковты тістеп алғаны белгілі болды. Бұл жағдайды IBA комиссиясы қарастырып, жекпе-жек нәтижесін өзгеріссіз қалдырды.