"Пәтер бермеді": Қазақтан шыққан әлем чемпионы өзіне табысталған пәтерді ала алмай жүр

Қазақ балуан Нұрқожа Қайпанов өзіне өткен жылы Астанадан берілген пәтер кілтін әлі ала алмай жүргенін айтты, деп хабарлайды Sportinside.kz.

Бұл туралы ол спорт журналисі Аслан Қаженовке берген сұқбатында айтты.

– Өткен жылы әлем чемпионы атандыңыз, дұрыс па?
– Иә.
– Сол кезде сізге пәтер сертификаты табысталды. Пәтердің кілтін алдыңыз ба?
– Жоқ. Сертификат берілді, бірақ пәтер кілті жоқ. Бұл мәселе созылып кетті.
– Бір жыл өтті, бірақ пәтер әлі жоқ па?
– Иә, бір жыл өтті. Әзірге қолда бар жалғыз нәрсе – сертификат.
– Бұл сертификатты Астанадағы үлкен жиында, федерацияның қорытынды отырысында тапсырды, иә?
– Иә, федерацияда, жыл қорытындысы бойынша.
– Сонда олар ештеңеден қорықпайтын сияқты: сертификатты береді, бірақ әлем аренасында Қазақстанның намысын қорғап жүрген спортшыға пәтерді бермейді. Бұл ұят жағдай ғой.
– Не айтарымды білмеймін. Қазіргі таңда нақты ақпарат жоқ.
– Осы видео жарыққа шыққаннан кейін, мүмкін, ойланатын шығар. Айтылған сөз – атылған оқ.
– Егер берсе, әрине, жақсы болар еді.
– Жаңа жылды жаңа пәтерде қарсы алуыңызды тілеймін. Жалдамалы үйде тұра бермесеңіз екен. Қазір қайда тұрасыз?
– Талғар қаласында.

Айта кетейік, Нұрқожа Қайпанов – 2024 жылғы еркін күрестен әлем чемпионы, 2019 жылғы әлем чемпионатының күміс жүлдегері, Азияның үш дүркін чемпионы (2019, 2021, 2025). Сондай-ақ спорттағы жоғары жетістіктері үшін "Құрмет" орденімен марапатталған.