"Алтын аламын": тізесінен ауыр жарақат алған дзюдошы маңызды мәлімдеме жасады

Будапештте (Венгрия) өткен 2025 жылғы дзюдодан әлем чемпионатынан шығып қалғаннан кейін қазақстандық спортшы Мейірлан Максим жанкүйерлеріне үндеу жасады, деп хабарлайды Sportinside.kz.

90 келіге дейінгі салмақта белдескен дзюдошы жарысты 1/8 финал сатысында аяқтады. Бұл кезеңде ол Жапонияның өкілі, төрт дүркін әлем чемпионы (соның үшеуі – командалық жарыста) Гоки Тадзимадан мерзімінен бұрын жеңіліп қалды. Белдесу барысында Мейрлан жарақат алып, жекпе-жекті жалғастыра алмады.

Спортшы өзінің Instagram парақшасында мәлімдеме жасады:

«Баршаңызға рақмет! Маған қолдау көрсетіп жатқандарыңызды көремін, өзімде бәрі жақсы. Бұл турнир – мен үшін ең алғашқы ірі жарыстардың бірі болды. Сондықтан келесі жолы бүгінгіден де мықты күйде ораламын. Келесі біріншілікте міндетті түрде алтын медаль аламын», – деп жазды дзюдошы.