QAZAQSTAN KOKPAR CUP: Шымкентте өтіп жатқан республикалық турнирдің жартылай финалистері анықталды

Шымкент қаласының Орталық ипподромында алғаш рет ұйымдастырылып жатқан QAZAQSTAN KOKPAR CUP клубтық командалар арасындағы республикалық турнир қыза түсті. 17 қазанда басталған дүбірлі додада еліміздің түкпір-түкпірінен іріктелген жеті команда бақ сынап, екі топқа бөлініп өзара шеберлік байқасты, деп хабарлайды Sportinside.kz.

А тобында ерекше ойын өрнегін көрсеткен Қазығұрт пен Шымкент командалары жоғары ұпай жинап, жартылай финалға жолдама алды.
В тобының үздіктері болып Аманат-Шу мен Меркі-Қант командалары танылды.

Осылайша, 21 қазанда өтетін жартылай финалдық жұптар төмендегідей белгіленді:

• Қазығұрт – Меркі-Қант
• Аманат-Шу – Шымкент

Жеңіске жеткен қос команда финалда шеберлік байқасады, ал жеңіліс тапқандар қола медаль үшін таласады.

• Өтетін орны: Шымкент қаласы, Орталық ипподром
• Кіру: тегін
• Жартылай финал: 21 қазан, сағат 10:00
• Тікелей эфир: Qazsport телеарнасы

Бұл турнир ұлттық спортты дәріптеу мен көкпардың клубтық форматтағы бәсекесін жаңа деңгейге көтеруді мақсат етеді.

QAZAQSTAN KOKPAR CUP-тың жалпы жүлде қоры – 28,5 миллион теңге. Бұл – көкпар спортын дамытуға деген айрықша қолдаудың көрсеткіші.

• Бас демеуші: Самұрық-Қазына әл-ауқат қоры
• Бас серіктес: Спортты қолдау қоры
• Ақпараттық серіктестер: Qazsport және 24KZ телеарналары

Ұлттық ойынның беделін арттырып, жанкүйерлерді бір арнаға тоғыстырған бұл турнир көкпар жанашырлары үшін үлкен спорттық мереке болмақ. Шешуші матчтарды жіберіп алмаңыз!