5 баланың анасы Әйгерім Сәттібаеваға 1 миллион теңге сыйақы табысталды

Бес баланың анасы, белгілі боксшы Әйгерім Сәттібаева Семейде өткен Қазақстан чемпионатында алтын медаль жеңіп алғаннан кейін Тараз қаласының спорт басқармасынан 1 миллион теңге көлемінде сыйақы иеленді, деп хабарлайды Sportinside.kz.

14-21 қазан аралығында өткен ел біріншілігінде Әйгерім Сәттібаева 48 келі салмақ дәрежесінде өнер көрсетіп, барлық қарсыласын ұтып, финалға жолдама алды. Шешуші кездесуде ол Әнел Құдайбергенді жеңіп, Қазақстан чемпионы атанды. Бұл – оның 15 жыл үзілістен кейінгі тарихи жетістігі.

Жеңісінен кейін Тараз қаласының спорт басқармасы спортшыны арнайы марапаттап, 1 миллион теңге көлемінде ақшалай сыйақы табыстады.

Айта кетейік, биылғы Қазақстан чемпионатының жеңімпаздары мен жүлдегерлері негізінде 2025-2026 жылдарға арналған ұлттық құрама жасақталмақ.

Әйгерім Сәттібаева – бес баланың анасы, ал оның жары Олжас Сәттібаев та кезінде кәсіби бокспен айналысқан.

Еске сала кетейік, Әйгерім Сәттібаева 2024 жылы Таиландта өткен Азия чемпионатында қола жүлдеге қол жеткізген болатын.