Головкинді жеңген әлемге әйгілі Канело қазақ жігітінен қашып жүр

Қазақ боксшысы Бек Нұрмағанбет мексикалық Сауль "Канело" Альварестің жаттығу лагеріндегі дайындықтары туралы айтып берді, деп хабарлайды Sportinside.kz.

"Өзімді мақтағым келмейді, бірақ спаррингтерде айтарлықтай ілгерілеу бар. "Канело" мен Мунгиямен 10-12 раундтық спаррингке шығатын жігіттер бар. Солармен жұдырықтасқанда мен басым түсіп жатамын. Кейде өзім де ойланып қаламын: егер мен олардан мықты болсам, демек, менің деңгейім жоғары болғаны ғой", – дейді Нұрмағанбет.

Журналистің "Канеломен неге спарринг өткізбедің?" деген сұрағына спортшы күтпеген жауап берді.

"Бір рет спарринг өткіздік. Содан кейін маған қайта шығуға рұқсат бермеді. "Жарақаттап қоюың мүмкін" деді", – дейді Бек күліп. "Қатты соққы тигіздің бе?" деген сұраққа ол: "Білмеймін, бірақ оған жайсыз тиген болуы мүмкін", – деп жауап берді.

Айта кетейік, Бек Нұрмағанбет – бірнеше жылдан бері Сауль Альварестің командасының мүшесі. Оның кәсіби мансабын әлемге әйгілі бапкер Эдди Рейносо басқарады.