Сәкен Бибосынов ұтылып бара жатып, жеңісті жұлып алды

Бокстан Қазақстан құрамасының көшбасшыларының бірі, Түркістан облысының өкілі Сәкен Бибосынов Семейде өткен ел чемпионатының финалында жарқын жеңіске жетті, деп хабарлайды Sportinside.kz.

55 келіге дейінгі салмақ дәрежесінде өткен шешуші жекпе-жекте Сәкен Бибосынов Қызылорда облысының боксшысы Нұрсұлтан Алтынбекпен кездесті.

Кездесудің алғашқы раундында тәжірибелі фаворит Сәкен күтпеген жерден 2:3 есебімен жеңіліп қалды. Алайда екінші раундта ол шабыттанып, 5:0 есебімен басым түсті, ал соңғы үш минутта қарсыласын толықтай басып озып, айқын басымдықпен (5:0) жеңіске жетті.

Айта кетейік, Сәкен Бибосынов – 2021 жылғы әлем чемпионы, 2020 жылғы Токио Олимпиадасының қола жүлдегері.

Ал оның қарсыласы Нұрсұлтан Алтынбек бұған дейін U-22 жас санатындағы Азия чемпионатын екі рет жеңіп алған.