Әзербайжан клубы Чемпиондар лигасында "Қайратты" ұтқан "Реалмен" теңесті

Әзербайжанның "Қарабақ" клубы УЕФА Чемпиондар лигасының екінші турында өз алаңында Данияның "Копенгаген" командасын жеңді, деп хабарлайды Sportinside.kz.

Екінші тур аясындағы кездесу Бакудегі Тофик Бахрамов атындағы стадионда өтіп, алаң иелерінің пайдасына 2:0 есебімен аяқталды.

Гол авторлары – француз жартылай қорғаушысы Абделла Зубир (28-минут) мен ганалық шабуылшы Эммануэль Аддай (84-минут).

"Қарабақ" Чемпиондар лигасының биылғы маусымында екінші мәрте жеңіске жетті. Алты ұпай жинаған Әзербайжанның ең атақты клубы турнир кестесінде көшбасшылар – Германияның "Бавариясы" (Мюнхен), Испанияның "Реалы" (Мадрид) және Италияның "Интерімен" (Милан) теңесті.

Ал "Копенгаген" бір ұпаймен 26-орында тұр. Дания чемпионы 26 қарашада бесінші турда өз алаңында алматылық "Қайрат" клубын қабылдайды.