Әлем чемпионатындағы жеңілістен кейін Өзбекстан қазақ боксына қарсы шықты

Қыркүйек айында Ливерпульде өткен World Boxing ұйымы аясындағы тарихи әлем чемпионатында жалпыкомандалық есепте Қазақстан құрамасы бірінші орын алды. Өзбекстан екінші орынға тұрақтады, деп хабарлайды Sportinside.kz.

Әлем біріншілігі өтіп жатқан кезде Өзбекстанда жарияланған жазбалар мен пікірлердің әрқайсысы бөлек алғанда жеке көзқарас болып көрінгенімен, жиынтығында кейбіреулер үшін Қазақстан боксына қарсы ақпараттық шабуылдың басталғаны секілді әсер қалдыруы мүмкін.

Алғашқы "оқтардың" бірі Өзбекстан бокс федерациясының ресми Telegram арнасында шыққан (кейіннен өшіріп тастады) жазба болды.

"Біздің боксшы Жавохир Умматалиев ширек финалда Олимпиада ойындарының күміс жүлдегері, әлем чемпионы Нұрбек Оралбайды бірінші рейспен еліне қайтарды. Бүгін демалыс. Жавохир де, Нұрбек те демалып жатыр. Бірақ 13 қыркүйекте Умматалиев жартылай финалға шығады. Ал Нұрбек демала берсін", – делінген хабарламада.

Бұл – фактіні баяндау болғанымен, қызығы басқа: Қазақстан бокс федерациясы Айбек Оралбайдың Жахонгир Зокировты жеңгенінен кейін мұндай пікір айтқан жоқ.

Өзбекстан құрамасының жаттықтырушысы Рахматжон Рузиохунов та үнсіз қалмады. Ол жалпыкомандалық есепте тек ерлердің көрсеткішін алғанда Өзбекстан Қазақстаннан озып кеткенін еске салды (бұл дерек Қазақстанда жасырылмаған). Дегенмен, ерлер мен әйелдер боксшыларының нәтижесін қосқанда жеңімпаз Қазақстан болған еді.

Алайда мырза Рузиохунов мұнымен тоқтамады.

Ол Instagram stories-інде: "Қазақ блогерлері мен журналистеріне айтарым: Өзбекстан ерлер арасындағы әлем чемпионатында 6 алтын медаль жеңіп алып, сіздерді басып озды. Оның үстіне, біздің 19 жастағы боксшымыз сіздердің Олимпиада жүлдегерлеріңізді жеңді", – деп жазды.