19 жастағы қазақ қызы сенсация жасап, шахматтан әлем чемпионы атанды

19 жастағы Ксения Балабаева Лимада (Перу) өтіп жатқан 20 жасқа дейінгі жастар арасындағы рапид бойынша әлем чемпионатында алтын жүлдеге қол жеткізді, деп хабарлайды Sportinside.kz.

Турнир 23-25 қыркүйек аралығында швейцариялық жүйе бойынша 9-турда, 15+10 уақыт бақылауы бойынша өтті.

Ксения Балабаева жарысты 7 ұпаймен аяқтады. Соңғы күні ол Умида Омонованы жеңіп, Анна Журова және Афруза Хамдамовамен тең түсті. Бұл нәтижелер қазақ спортшысына уақытынан бұрын-ақ чемпиондық атақты қамтамасыз етуге мүмкіндік берді.

Жүлдегерлер үштігіне сондай-ақ Өзбекстан өкілі Афруза Хамдамова (6,5 ұпай) және FIDE атынан өнер көрсеткен Варвара Полякова (6,5) енді. Қазақстандық шахматшылардың арасында Амина Қайырбекова 6 ұпай жинап 7-орынға, ал Лия Құрманғалиева 5 ұпаймен 12-орынға табан тіреді.

Жасөспірімдер арасында 16 жастағы өзбекстандық Мұхаммадзохид Суёров 7,5 ұпаймен чемпион атанды.

Блиц бойынша сайыс 27-28 қыркүйекте өтеді.