"Аяғына қорғасын киіп алатын": Саттарханов туралы ел естімеген сұмдық жайт мәлім болды

Бокстан екі дүркін Олимпиада жүлдегері, тұңғыш әлем чемпионы Болат Жұмаділов журналист Нұрсейіт Жылқышыбайға берген сұхбатында інісі әрі әріптесі болған Бекзат Саттарханов жайлы ел біле бермейтін сырларын айтты, деп хабарлайды Sportinside.kz.

Ауыр қазаға қарамастан, қазақ спортының жарық жұлдызы болған Бекзаттың жан-жақты қабілеті мен еңбекқорлығын ерекше атап өткен Жұмаділов, оның құрамаға қалай қабылданғанын және Олимпиада жолындағы күресін еске алды.

"Бауырымыздың жатқан жері жайлы болсын. Жаны жәннатта болсын! Бекзат өнерлі жігіт еді. Сегіз қырлы, бір сырлы болатын. Тек бокспен шектелмей, ән айтатын, гитарада ойнайтын. Олар інілеріміз ғой. Мен 1973 жылғы болсам, олар 1980 жылғы. Нұржан Каримжанов, Серік Елеуов, Бекзат Саттарханов, Олжас Оразалиев, Мақсат Бақтыбазаров, Бауыржан Қайырменов – бәрі бір команда болды. Бір жыл ішінде түсіп, бірінші нөмірге айналды", – деді ол.

Жұмаділовтің айтуынша, Бекзат оның тұрақты спарринг серіктесі болған.

"Мен ересектер арасында 51 келіде болдым, ал ол жастар қатарында 57 келіде шықты. Бірақ біз бірге жаттығып, бір-біріміздің шеберлігімізді шыңдадық. Бекзат өте намысқой еді. Кросс кезінде әрдайым бірінші болып келетін. Ұзақ қашықтықтарға жүгіргенде аяғына қорғасын байлап алатын. Еңбегінің арқасында, Алланың қалауымен, Олимпиадада алтыннан алқа тақты", – деп еске алды чемпион.

Сондай-ақ ол 57 келідегі негізгі қарсылас жағдайын да түсіндірді:

"Бұл салмақта Бақтияр Тілегенов көшбасшы еді, оны Әлем чемпионатына Хьюстонға алып барды. Ал Бекзат Ташкентте жолдаманы жеңіп алып, Олимпиадаға бірінші нөмірлі болып барды", – деді ол.