Өзбекстан құрамасы шу шығарып, жарыстан біржола шеттетілді

Гандболдан жасөспірімдер арасындағы Азия чемпионатында Өзбекстан құрамасы жарыстан шеттетілді. Бұл турнир Ташкентте өткен еді, деп хабарлайды Sportinside.kz.

Жергілікті құрама жас шектеуін (19 жастан аспау керек) бұзғаны үшін жазаланды. Үш өзбек спортшысының құжаттарында жасқа байланысты жарыстың талабын бұзғаны анықталды.

Азия гандбол федерациясы бұл әрекетті ережеге қайшы деп танып, Өзбекстан құрамасын чемпионаттан шеттету және оның барлық нәтижесін жою жөнінде шешім қабылдады. Федерация бұл шешімге қарсы Халықаралық гандбол федерациясына апелляция жолдаған.

Ал Қазақстан құрамасы жарысты жетінші орынмен аяқтады. Соңғы ойында қазақстандық гандболшы қыздар Гонконгпен кездесіп, 45:37 есебімен жеңіске жетті. Ең көп голды Кристина Палей еншілеп, тоғыз доп салды.

Жасөспірімдер арасындағы Азия чемпионы атағын Жапония құрамасы иеленді. Финалда олар Оңтүстік Кореяны 20:18 есебімен жеңді. Қола жүлдені Қытай құрамасы иеленіп, Қытай Тайбэйін 22:17 есебімен тізе бүктірді.