Головкиннің ізбасары кәсіпқой бокстағы айқасын өткізеді

Қазақстандық кәсіпқой боксшы Виктор Темировтың (8-0, 6 КО) келесі жекпе-жегі қашан болатыны анықталды, деп хабарлайды Sportinside.kz.

Виктор Темиров 5 қыркүйекте Алматыда өтетін Ali Akhmedov Promotions ұйымдастыратын бокс кешінде жекпе-жек өткізеді. Ұйымдастырушылардың айтуынша, оның қарсыласы Үндістаннан келген Сантош Барали (2-1, 1 КО) болмақ.

Виктор соңғы жекпе-жегін 14 маусым күні Германияның Ганновер қаласында өткізіп, үшінші раундта поляк боксшысы Лукаш Барабашты (4-17, 2 КО) техникалық нокаутпен жеңген еді.

Ал Сантош Барали әзірге елінен тыс жерде рингке шықпаған. Ол 26 шілдеде Бангалор қаласында өткен айқаста отандасы Сурадж Сингхті (3-2, 3 КО) төрешілердің шешімімен жеңген.

Айта кетейік, Виктор Темиров кәсіпқой рингте "Қасапшы" деген лақап атпен танымал. Дегенмен, Германиядағы жанкүйерлер оны кәсіби мансабын дәл осы елде бастаған Геннадий Головкиннің жас кезімен салыстырады.