Қазақстандық теннисші АҚШ-та сенсация жасап, турнирдің чемпионы атанды

Қазақстанның бірінші ракеткасы, әйелдер арасындағы жұптық разрядтағы теннисші Анна Данилина АҚШ-тағы Кливленд қаласында өткен WTA 250 турнирінде чемпион атанды, деп хабарлайды Sportinside.kz.

Әлемдік рейтингте ондыққа кіретін спортшы сербиялық Александра Круничпен бірге жарысқа қатысып, биылғы маусымда "Ролан Гаррос" турнирінің финалына шыққан болатын. Кливленд турнирінде олардың дуэті бірінші номермен қатар қойылды.

Финалда Данилина мен Круничке қытайлық Цзян Синьюй және Тайбэйден келген Чжань Хаоцин қарсы шықты, олар турнирде екінші номермен тіркелген еді.

Шешуші матч екі сетке созылды, бірінші сет тай-брейкте аяқталды. Қорытынды есеп – 7:6 (7:3), 6:4, жеңіс Қазақстандық және сербиялық спортшылардың пайдасына шешілді.

Теннисшілер кортта 1 сағат 34 минут бойы ойнады. Сол уақыт ішінде Данилина мен Крунич үш эйс орындап, төрт қосар қате жіберді және 12 брейк-пойнттің төртін тиімді пайдаланды.

30 жастағы Қазақстандық спортшы үшін бұл жұптық разрядтағы WTA деңгейіндегі 11-ші титулы. Биылғы маусымда бұл Данилина үшін екінші трофей болды – маусым айында ол чехиялық Мари Боузкамен бірге Истбурн турнирінде чемпион атанған.