18 жастағы қазақ баласы тарих жасап, әлем чемпионатының финалына шықты

Болгарияның Самоков қаласында 20 жасқа дейінгі жасөспірімдер арасындағы әлем чемпионаты басталды, деп хабарлайды Sportinside.kz.

Еркін күрестен 125 келіге дейінгі салмақта сынға түскен Азия чемпионы Едіге Қасымбек жарысты 1/8 финалдан бастады. Алғашқы белдесуінде ол моңғол балуаны Нарантулга Дармаабазарды 15:12 есебімен жеңді.

Ширек финалда Едіге Оңтүстік Корея спортшысы Байджун Джангты 6:0 есебімен айқын басымдықпен ұтты.

Жартылай финалда қазақ балуаны АҚШ өкілі Коул Мирасоланы 11:0 есебімен тас-талқан етіп, финалға жолдама алды.

Енді ертең Едіге Қасымбек алтын медаль үшін әзірбайжандық Юсиф Дурсунов пен ирандық Мохаммад Нежад арасындағы жекпе-жектің жеңімпазымен күреседі.