"Жол ашады": елімізде тағы бір клуб легионерлерден бас тартпақ

Семей қаласының мақтанышы – «Елімай» футбол клубы жаңа даму кезеңіне аяқ басты. Енді команда коммерциялық емес акционерлік қоғам (КЕАҚ) ретінде жұмысын жалғастырады. Бұл шешім клубтың жанашырларын тартуға, жанкүйерлер мен кәсіпкерлердің команданың болашағына араласуына мүмкіндік береді.

Клубтың баспасөз қызметі таратқан мәліметке сүйенсек, жаңа форматтың негізгі мақсаты – ашықтықты қамтамасыз етіп, қауымдастықтық иелік жүйесін дамыту. Яғни, кез келген қала тұрғыны немесе ірі инвестор «Елімайдың» акционері бола алады.

«Мұндай тәсіл тек инвестиция тартуға ғана емес, сонымен қатар команда төңірегінде біріктірілген шынайы қауымдастық құруға жол ашады», – делінген клубтың ресми мәлімдемесінде.

Құрам жаңармақ: легионерлермен қоштасу басталды

Жаңа ұйымдық өзгерістерге қоса, «Елімай» құрамында да үлкен өзгерістер күтілуде. Бұл қадам қаржылық қиындықтар мен шетелдік ойыншыларға бюджет есебінен жалақы төлеуге тыйым салатын заңның күшіне енуімен тікелей байланысты.

Соңғы апталарда-ақ клуб румыниялық Эдуард Флореску мен черногориялық Фейсал Муличпен ресми түрде қоштасқан. Кететіндер тізімі мұнымен шектелмейді – алдағы уақытта мына ойыншылардың да командадан кетуі мүмкін:

• Максим Коваль
• Неманья Чаласан
• Самуэль Одеоибо
• Кевин Ролон
• Никита Корзун
• Давид Майком
• Евгений Березкин
• Роман Тугарев
• Фессу Плака

Бұл – құрамды "тазарту" процесінің басы ғана болуы мүмкін.

Турнирлік жағдай және келесі қарсылас

Қазіргі таңда «Елімай» Қазақстан чемпионатының турнирлік кестесінде алтыншы орында тұр. 11 турдан кейін команда 5 жеңіс, 2 тең ойын және 4 жеңілістен кейін 17 ұпай жинаған. Команданың бас бапкері – Андрей Карпович.

Келесі турда семейлік команда қонақта шымкенттік «Ордабасы» клубымен кездеседі. Бұл ойын «Елімай» үшін құрамдағы өзгерістер аясында маңызды сынақ болмақ.