Қазақстандық теннисші бір аптаның ішінде екі беделді турнирдің чемпионы атанды

Қазақстанның үздік теннисшісі Александр Бублик Аустрияның Кицбюэль қаласында өткен ATP 250 санатындағы топырақ жабындысындағы турнирдің финалында жеңіске жетті, деп хабарлайды Sportinside.kz.

Әлемдік рейтингте 30-орында тұрған қазақстандық спортшы финалда ол әлемнің 100-ракеткасы, француз Артур Казомен кездесті.

Финалдық матч екі сеттен тұрды және Александр Бублик 6:4, 6:3 есебімен жеңіске жетті.

Теннисшілер кортта 1 сағат 26 минут ойнады. Осы уақыт ішінде Александр Бублик бес эйс жасап, жеті қосар қателік жіберіп, жеті брейк-пойнттің үшеуін тиімді пайдаланды.

Кицбюэльдегі жеңісі үшін Александр Бублик 250 рейтингтік ұпай иеленіп, келесі аптада жаңартылатын әлемдік рейтингте 25-орынға көтеріледі.

Айта кетейік, бұл – қазақстандық теннисшінің бір апта ішіндегі топырақ жабындысындағы екінші ATP 250 турнирдегі жеңісі. Өткен демалыс күндері ол Швейцарияда өткен дәл осындай турнирде де чемпион атанған болатын.