10 жастағы Владислав Ким – сырт көзге кәдімгі бесінші сынып оқушысы. Бірақ оның жетістіктері мен өмірге деген көзқарасы көптеген ересектерге үлгі боларлық. Ол астанадағы Silcway лицейінде білім алады. Бала кезінен-ақ халықаралық білім додаларына қатысып, биіктен көрініп келеді, деп Sportinside.kz тілшісі Azh.kz сайтына сілтеме жасап хабарлайды.
Әлемді таңғалдырған жеңіс
Биыл Владислав үшін ерекше жыл болды. Ол бірден үш халықаралық олимпиаданың іріктеуінен өтіп, финалға жолдама алды. Ақпан айында Math Challenge байқауында топ жарып, онлайн кезеңнен кейін финалға – Таиландтың астанасы Бангкокқа аттанды. Мұнда әлемнің 91 елінен келген 10 мыңнан астам оқушының ішінен үздік ондыққа еніп, алтын медаль иегері атанды. Жеткіншек әлем бойынша 7-орынға тұрақтап, ел абыройын асқақтатты.
Бірақ бұл – тек бастамасы еді. Көп ұзамай Влад тағы бір додада, бұл жолы EXCEL International Math Olympiad олимпиадасында, өз жас ерекшелігі бойынша бірінші орынды иеленіп, АҚШ-тың Лос-Анджелес қаласында жеңіс тұғырынан көрінді. Калифорния университетінде (UCLA) өткен бұл жарыста ол абсолютті жеңімпаз атанып, арнайы планшет сыйлығына ие болды.
Жеңіске жетелеген тәрбие мен құндылық
Владислав – көпбалалы отбасынан. Кимдер әулетінде бес бала бар, және бәрі де өз салаларында үздік. Олардың жеңіске деген ынтасы мен тынымсыз еңбегінің артында – ата-ананың үлкен еңбегі жатыр.
Сергей Ким, Владиславтың әкесі:
"6 мен 20 жас аралығындағы кезең – өмірге іргетас қаланатын уақыт. Бұл жылдарды оқу мен өз-өзіңді дамытуға арнасаң – болашақта еркін таңдау болады. Ал егер сол жылдарды бос қызыққа жұмсасаң – өмір бойы басқа біреудің мақсатына жұмыс істеуің мүмкін."
Бұл – жай ғана тәрбие емес, отбасының құндылық жүйесі. Екі ата-ана да жоғары білімді, балаларын ғылым мен өнерге баулып келеді.
Тек математика емес…
Влад тек білімге емес, спорт пен өнерге де жақын. Бұрын ол каратэмен шұғылданып, жүлделі орындарға ие болған. Қазір домбыра тартып үйреніп жүр. Мектептегі үйірмеге қатысып, YouTube арқылы да өз бетімен үйренуде.
Жақында мектеп концертінде ол итальян сыныптасымен бірге күй орындап, этнофьюжн стилінде өнер көрсетті. Бұл – ұлт пен ұрпақты жалғаған жарасымды көрініс.
Жаңа арман – Америка
Америкада өткен жарыстан кейін Владиславтың жаңа арманы пайда болды – болашақта АҚШ-тың беделді университетінде оқуды қалайды. Бұл – жеңіске жеткен сайын ұлғайып келе жатқан армандардың бірі ғана.