Бокстан Олимпиада ойындарының екі мәрте күміс жүлдегері, әлем чемпионы Болат Жұмаділов Астанадағы шәкірттерін шағын жертөледе дайындап жүр. Бұл туралы ол "Уақыт көрсетеді" бағдарламасында әңгімеледі, деп Sportinside.kz тілшісі 1bol.kz сайтына сілтеме жасап хабарлайды.
Даңқты спортшы тұрып жатқан үйінің техникалық бөлігін бокс залына айналдырған. Мұнда қазір жастармен бірге ересектер де жаттығып жүр. Алайда кадрлардан көрінгендей, залдың жағдайы мүшкіл: қолғаптар да, "лапалар" да әбден тозған.
"Үй тұрғындарына мұнда бокс залы ашылатынын, ешқандай коммерциялық ұйым емес екенін жақсылап түсіндірдік. Қазір ешкім кедергі келтіріп жатқан жоқ. Бірақ бұл орын бізге тиесілі емес, сондықтан кез келген сәтте келіп, "босат" деуі мүмкін. Жөндеу жұмыстарын бастамауымыздың себебі де осы. Үйдің жоғарғы қабатында өзім тұрамын, кейде осы жерде ұйықтап, шай ішіп аламыз", – дейді Болат Жұмаділов.
Боксшы болашақта бұл мәселенің оң шешімін табарына сенім білдірді.