Ауыр салмақтағы UFC чемпионы Том Аспиналл промоушен тарихындағы ең ұлы файтерлердің бірі саналатын Джон Джонстың октагонға қайта оралуы туралы қауесетке қатысты пікірін айтты, деп хабарлайды Sportinside.kz.
Британиялық аралас жекпе-жек шебері, ауыр салмақтағы UFC чемпионы Том Аспиналл журналист Ариэль Хельваниге берген сұхбатында аңыз спортшының камбэгіне қатысты ойын жасырмады.
"Ох, бұл тым жалықтырды. Жалықтырып жіберді. Бұған бір секунд та ой жүгірткен емеспін. Маған қызық емес. Әлемге де қызық болмауы керек. Бұның қандай мәні бар? Бұл – жалған үміт", – деді Аспиналл.
Джон Джонс – 37 жастағы америкалық аралас жекпе-жек шебері. Кәсіби мансабын 2008 жылы бастаған ол UFC-де екі салмақта чемпион атанды: жартылай ауыр салмақта (2011-2015, 2018-2020) және ауыр салмақта (2023-2025).
Оның ММА-дегі рекорды – 28-1. Жалғыз жеңілісі даулы дисквалификация нәтижесінде тіркелген. Соңғы жекпе-жегін ол 2024 жылдың қарашасында UFC 309 турнирінде өткізді. 2025 жылдың 22 маусымында Джон Джонс кәсіби мансабын аяқтағаны белгілі болды.
Том Аспиналл – ауыр салмақтағы UFC чемпионы, жаңа буын өкілдерінің бірі. Ол жас, жылдам әрі атлетикалық қасиеттерімен ерекшеленеді. Рекорды – 15-3. Сергей Павлович пен Кертис Блэйдсті нокаутпен, ал Александр Волков пен Андрей Орловскийді сабмишн арқылы жеңген. Бұрын уақытша чемпион болған Аспиналл Джон Джонс мансабын аяқтаған соң толыққанды чемпион атағын алды.