Париж Олимпиадасында 92 кг дейінгі салмақ дәрежесінде жеңіске жеткен өзбек боксшысы Лазизбек Муллажонов допинг қолданғаны үшін жарыстан шеттетілді. Бұл туралы Дүниежүзілік допингке қарсы агенттіктің (WADA) баспасөз қызметі мәлімдеді, деп хабарлайды Sportinside.kz.
26 жастағы спортшы 11 маусымда допинг-тест тапсырған, нәтижесінде оның ағзасынан тыйым салынған анаболикалық-андрогенді стероид табылған. Атап айтқанда, ITA (Халықаралық тестілеу агенттігі) мәліметінше, Лазизбектен метастерон метаболиттері анықталған.
Боксшы бұл шешімге қарсы шығып, допинг-тест нәтижесін қайта қарауға өтініш бере алады.
Айта кетейік, Лазизбек Муллажонов 2023 жылы туған қаласы Ташкентте өткен әлем чемпионатында қола медаль иеленген. 2022 жылы Азия чемпионы атанған. Ал кәсіпқой бокста 6 жекпе-жек өткізіп, барлығында да жеңіске жеткен.