2025 жылдың 27 шілдесінде Жамбыл облысында болған жол апатына байланысты қылмыстық іс қозғалды. Бұл апатқа танымал UFC жекпе-жекшісі Шавкат Рахмоновтың жұбайы қатысты деген мәлімет әлеуметтік желілерде тарады, деп жазады Sportinside.kz.
Облыстық полиция департаментінің хабарлауынша, тергеу Қазақстан Республикасы Қылмыстық кодексінің 345-бабы бойынша басталды. Бұл бап – "Көлік құралдарын басқаратын адамдардың жол қозғалысы немесе көлік құралдарын пайдалану ережелерін бұзуы, абайсызда екі немесе одан да көп адамның өліміне әкеп соғу" – сотқа дейінгі тергеуді көздейді.
Полицияның ресми мәлімдемесінде:
"Оқиғаның нақты себептері мен мән-жайларын анықтау үшін тергеу амалдары жүргізілуде. Көлік арнайы айыптұраққа қойылды", – делінген.
Жол апаты Алматы – Екатеринбург бағытындағы республикалық маңызы бар тас жолдың 299-шақырымында, 27 шілде күні таңғы сағат 08:50-де болған. Toyota Land Cruiser 200 көлігін тізгіндеген жүргізуші Қарағандыдан Алматыға қарай бағыт алып келе жатқанда рөлге ие бола алмай, көлік аударылған.
Салдарынан екі адам оқиға орнында көз жұмып, тағы екі адам, олардың қатарында жүргізуші мен 2022 жылы туған бала, ауруханаға жеткізілді. Сондай-ақ Шавкат Рахмоновтың жұбайы мен ұлының жағдайы туралы Жамбыл облысы Денсаулық сақтау басқармасы ақпарат берді.
Қоғамда бұл көлікті тізгіндеген адамның Шавкат Рахмоновтың жұбайы екені туралы ақпарат қызу талқылануда. Алайда, полиция бұл мәліметті әзірге ресми түрде растаған жоқ.