"Легия" клубының шабуылшысы Жан-Пьер Нсаме "Ақтөбе" клубына қарсы матчтан кейін жарақат алды, деп хабарлайды Sportinside.kz.
Кеше, 17 шілдеде футболдан Еуропа лигасының іріктеу кезеңі аясында "Ақтөбе" мен Польшаның "Легия" клубтары арасындағы қарымта матч өтті.
Ойын аяқталған соң футболшылар жанкүйерлерге алғыс айту үшін трибунаға жақындаған. Сол сәтте "Легия" командасының камерундық шабуылшысы Жан-Пьер Нсаменің басына жанкүйерлер белгісіз затты лақтырып жіберген. Салдарынан ойыншы газонға құлап түскен, кейін басына мұз қойып, киім ауыстыру бөлмесіне кеткен.
Әзірге УЕФА тарапынан "Ақтөбе" клубына қандай да бір жаза қолданылатыны не қолданылмайтыны айтылмады.
Еске салайық, "Ақтөбе" өз алаңында өткен жауапты ойында 0:1 есебімен жеңіліп қалды. Қонақтар шешуші голды негізгі уақытқа қосылған бірінші минутта соқты – көзге түскен ойыншы колумбиялық жартылай қорғаушы Юрген Элитим болды.
Екі ойын қорытындысы бойынша 2:0 есебімен "Легия" жеңіске жетті. Осылайша, "Ақтөбе" Еуропа лигасының іріктеу кезеңінен шығып қалып, енді олар өз жолын Конференциялар лигасында жалғастыратын болды. Келесі кезеңде қазақстандық клуб Чехияның "Спарта" командасымен кездеседі.